იტალიაში ექვს ტონა ნაგავში 1 მილიონიანი ლოტოს ბილეთი იპოვეს

2 წუთი

ბარის პროვინციის ქალაქ ბითონტოში დასუფთავების კომპანია Sanb-ის თანამშრომლებმა ორი დღე დახარჯეს ერთი პატარა ქაღალდის საძებნელად. 4 აგვისტოს, დილის ხუთის ნახევარზე, ლოტოს ბილეთს ჩამოხეულ პარკში, უკვე გაფუჭებულ ტალონებს შორის მიაგნეს — მთლიანად უვნებელს. ბილეთზე მილიონი ევრო იყო.

„არ ანაზღაურდება“ — ფრაზა, რომელმაც მოთამაშე შეცდომაში შეიყვანა

ბითონტოელი მოთამაშე წლების განმავლობაში ერთსა და იმავე ნომრებს ირჩევდა — კომბინაცია ახლობელ ადამიანთან იყო დაკავშირებული. იტალიური მედიის ცნობით, საქმე ეხება MillionDay-ს, სადაც 55 ნომრიდან ხუთი უნდა გამოიცნო. 31 ივლისის გათამაშებაზე სწორედ ეს ხუთი ნომერი ამოვიდა.

კვირას, 2 აგვისტოს, მოთამაშე ჩვეულებრივ შევიდა მაღაზიაში და ტალონი აპარატში შეამოწმა. პასუხი იყო: „არ ანაზღაურდება“. ლოტარიის წესებით ეს ფრაზა ორ სხვადასხვა რამეს ნიშნავს — ან ბილეთი მოგებული არ არის, ან მოგება იმდენად დიდია, რომ მცირე მაღაზიას მისი გაცემის უფლება არ აქვს. მოთამაშემ პირველი ვარიანტი ივარაუდა და ტალონი ურნაში ჩააგდო.

რეკლამა
kargiambebi.ge — აქ შეიძლება იყოს თქვენი რეკლამა

სახლში დაბრუნებულს ოჯახის წევრმა უთხრა, რომ მისი ჩვეული ნომრები გათამაშებაზე ამოვიდა. ოჯახი მაშინვე მაღაზიაში დაბრუნდა, მაგრამ ურნა უკვე დაცლილი იყო და ნაგავი Sanb-ის მანქანას გაჰყვა.

ექვსი ტონა, შეიარაღებული დაცვა და გამთენიის ხუთის ნახევარი

Sanb საჯარო კომპანიაა და ბითონტოს, ტერლიცის, კორატოსა და რუვო-დი-პულიის ნარჩენებს აგროვებს. კომპანიის ხელმძღვანელმა რობერტო ნიკოლა ტოსკანომ (Roberto Nicola Toscano) თანამშრომლებთან ერთად ნაგვის მთელი გზა აღადგინა — ურნიდან კონკრეტულ მანქანამდე. ავტომობილი იპოვეს და გააჩერეს მანამ, სანამ ტვირთს კომპაქტორში, ნარჩენების დამწნეხ დანადგარში, გადმოცლიდა.

„საბედნიეროდ, კვირა იყო“, — უთხრა ტოსკანომ TgCom24-ს. — „თორემ ტვირთი უკვე ნაგავსაყრელზე იქნებოდა“. კომპაქტორი იზოლირეს და შეიარაღებული დაცვის ქვეშ დააყენეს.

ტვირთი ლიცენზირებულ საწარმოში გადაიტანეს, სადაც მუშებს დაცული პირობებით შეეძლოთ მუშაობა — ნაგავში საშიში მასალაც ხვდება. იქ ექვსი ტონა ნარჩენის გადარჩევა დაიწყო.

„ჩამოხეულ პარკში იდო, სხვა, უკვე გაფუჭებულ ტალონებთან ერთად. ეს ერთ-ერთი იმ მცირერიცხოვანთაგანი იყო, რომელიც უვნებელი დარჩა“, — უთხრა ტოსკანომ სააგენტო ANSA-ს. იმავე საუბარში მან დასძინა, რომ ამბავს „რაღაც სასწაულებრივი აქვს“.

ვინ გადაიხადა ძებნის ხარჯი

ოპერაციამ Sanb-ს დამატებითი დანახარჯი მოუტანა, კომპანია კი საჯაროა — ხარჯი საბოლოოდ გადასახადის გადამხდელებს დააწვებოდა. ამიტომ ბილეთის მფლობელმა ძებნის დაწყებამდე ხელი მოაწერა დოკუმენტს, რომლითაც დამატებითი ხარჯების ანაზღაურება იკისრა. მისი ვინაობა არ გამხდარა ცნობილი.

გაზიარება